កូរ៉េខាងជើង បាញ់មីស៊ីលផ្លោង២គ្រាប់ ធ្លាក់ចូលដែនទឹកសេដ្ឋកិច្ចផ្តាច់មុខរបស់ជប៉ុន
តូក្យូ៖ មន្ត្រីក្រសួងការពារជាតិជប៉ុន បានប្រាប់អ្នកយកព័ត៌មានថា កាំជ្រួចមីស៊ីលផ្លោងចំនួនពីរគ្រាប់ដែលកូរ៉េខាងជើងបាញ់ បានធ្លាក់ចូលទៅក្នុងដែនទឹក ក្នុងតំបន់សេដ្ឋកិច្ចផ្តាច់មុខរបស់ខ្លួន កាលពីថ្ងៃព្រហស្បតិ៍។
អនុរដ្ឋមន្ត្រីក្រសួងការពារជាតិ លោក Kimi Onoda បាននិយាយយ៉ាងដូច្នេះថា «កាំជ្រួចផ្លោងចំនួនពីរគ្រាប់ បានធ្លាក់ចូលក្នុងតំបន់សេដ្ឋកិច្ចផ្តាច់មុខជប៉ុន»។
ជុំវិញបញ្ហានេះដែរ នាយករដ្ឋមន្ត្រីជប៉ុន លោក Fumio Kishida បាននិយាយថា «ការបាញ់មីស៊ីលនៅថ្ងៃនេះ បំពានលើដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិ និងជាទង្វើដែលមិនមានការប្រុងប្រយ័ត្ន ដែលបង្កើនការបង្កហេតុដល់សហគមន៍អន្តរជាតិ»។
សូមជម្រាបថា កាលពីពីរសប្តាហ៍មុន ប្រទេសជប៉ុនដាក់ដំណើរការយ៉ាងឆាប់រហ័ស នូវប្រព័ន្ធព្រមានមីស៊ីលរបស់ខ្លួននៅតំបន់ភាគខាងត្បូងនៃកោះអូគីណាវ៉ា នៅពេលដែលទីក្រុងព្យុងយ៉ាងបានប៉ុនប៉ងបរាជ័យក្នុងបាញ់បង្ហោះផ្កាយរណបទៅក្នុងលំហ។ ប្រព័ន្ធផ្សព្វផ្សាយរដ្ឋកូរ៉េខាងជើងបាននិយាយថា ផ្កាយរណបនោះបានធ្លាក់ចូលទៅក្នុងសមុទ្រភ្លាមៗ បន្ទាប់ពីការបាញ់បង្ហោះ ដោយបាន «ធ្លាក់» ក្នុងអំឡុងពេលធ្វើដំណើររបស់វា៕
