រុស្ស៉ី បដិសេធជំនួយរបស់ UN ក្នុងការជួយដល់អ្នករងផលប៉ះពាល់ពីការបាក់ទំនប់ កាខូវកា
មូស្គូ៖ រុស្ស៉ី បានបដិសេធសំណើរបស់អង្គការសហប្រជាជាតិ (UN) ក្នុងការជួយដល់អ្នកស្រុកដែលរងផលប៉ះពាល់ដោយទឹកជំនន់ ពីការបាក់ទំនប់ទឹក កាខូវកា (Kakhovka) ខណៈចំនួនអ្នកស្លាប់កើនឡើង ហើយបញ្ហាទឹកកខ្វក់បង្ខំឲ្យអាជ្ញាធរសម្រេចបិទទីតាំងឆ្នេរដ៏ពេញនិយមមួយនៃសមុទ្រខ្មៅ ដែល ស្ថិតនៅភាគខាងត្បូងអ៊ុយក្រែន។
ការបាក់ទំនប់ដែលគ្រប់គ្រងដោយទីក្រុងមូស្គូ កាលពីថ្ងៃទី៦ ខែមិថុនា បានបង្កឲ្យមានទឹកជំនន់នៅទូទាំងភាគខាងត្បូងអ៊ុយក្រែន និងផ្នែកខ្លះដែល កាន់កាប់ដោយរុស្ស៉ីនៃតំបន់ខឺសុន បំផ្លាញផ្ទះសម្បែង និងដីស្រែចម្ការ រួមទាំងកាត់ផ្តាច់ការផ្គត់ផ្គង់ដល់អ្នកស្រុកនៅទីនោះ។
លោកស្រី ដេននីស ប្រោន (Denise Brown) ដែលជាអ្នកសម្របសម្រួលផ្នែក មនុស្សធម៌របស់ UN សម្រាប់អ៊ុយក្រែន បានគូសបញ្ជាក់ថា «ជំនួយមិនអាចត្រូវបានគេបដិសេធ ចំពោះអ្នកដែលកំពុងត្រូវការនោះទេ»។ UN បានជំរុញឲ្យភាគីរុស្ស៉ី បំពេញកាតព្វកិច្ចក្រោមច្បាប់មនុស្សធម៌អន្តរជាតិ
ចំនួនអ្នកស្លាប់បានកើនឡើងដល់ ៥២នាក់ ដោយមន្ត្រីរុស្ស៉ីនិយាយថា មនុស្ស ៣៥នាក់បានស្លាប់នៅក្នុងតំបន់ដែលខ្លួនគ្រប់គ្រង ហើយក្រសួងមហាផ្ទៃអ៊ុយក្រែន ឲ្យដឹងថាមនុស្សចំនួន ១៧នាក់បានស្លាប់ និង៣១នាក់កំពុងបាត់ខ្លួន។ ចំណែក មនុស្សជាង ១១,០០០ នាក់ត្រូវបានជម្លៀសចេញ ទាំងរុស្ស៉ី និងអ៊ុយក្រែន៕
