ចិននិងរុស្ស៉ី ត្រៀមធ្វើសមយុទ្ធយោធាជើងទឹកនិងអាកាសរួមគ្នា នៅតំបន់សមុទ្រជប៉ុន
ប៉េកាំង៖ នាវាចម្បាំងចិនមួយក្រុមកាលពីថ្ងៃអាទិត្យម្សិលមិញ បានចាកចេញពីប្រទេសចិន ដើម្បីទៅចូលរួមជាមួយកងកម្លាំងជើងទឹក និងអាកាសរបស់រុស្ស៉ី នៅឯតំបន់សមុទ្រជប៉ុន សម្រាប់ការធ្វើសមយុទ្ធយោធារួមគ្នាមួយ ដែលមានគោលដៅរក្សាការពារសន្តិសុខ នៅតាមតំបន់ផ្លូវទឹកយុទ្ធសាស្រ្ត។
ក្រសួងការពារជាតិចិន បានបន្ថែមថា ក្រុមនាវាចម្បាំងចិនខាងលើ ដែលរួមមាននាវាចម្បាំង៥គ្រឿង ហើយនិងឧទ្ធម្ភាគចក្រ៤គ្រឿង ដែលជាប្រភេទធ្វើប្រតិបត្តិការចេញពីនាវា បានចាកចេញពីកំពង់ផែនៃទីក្រុងឆេងតាវ (Qingdao) ភាគខាងកើតប្រទេស ហើយនឹងទៅជួបជាមួយកងកម្លាំងរបស់រុស្ស៉ី នៅទីតាំងមួយដែលបានកំណត់ទុក។ កាលពីថ្ងៃសៅរ៍សប្តាហ៍នេះ ក្រសួងការពារជាតិចិន បានប្រាប់ថា កងកម្លាំងជើងទឹកនិងអាកាសរបស់រុស្ស៉ី នឹងចូលរួមក្នុងសមយុទ្ធយោធា ដែលត្រូវធ្វើឡើងនៅតំបន់សមុទ្រជប៉ុន។
ដោយមានឈ្មោះសម្គាល់ថា Northern/Interaction-2023 សមយុទ្ធយោធារួមខាងលើ គូសបញ្ជាក់ឱ្យឃើញការកើនឡើង នៃកិច្ចសហប្រតិបត្តិការយោធារវាងចិននិងរុស្ស៉ី គិតចាប់តាំងពីការឈ្លានពានរបស់ទីក្រុងមូស្គូនៅអ៊ុយក្រែន ហើយវាប្រព្រឹត្តទៅស្របពេលដែលទីក្រុងប៉េកាំងបន្តបដិសេធចំពោះ ការអំពាវនាវឱ្យមានកិច្ចសន្ទនាយោធាកម្រិតខ្ពស់ឡើងវិញ ពីសំណាក់សហរដ្ឋអាមេរិក។
គួរបញ្ជាក់ថា រដ្ឋមន្រ្តីការពារជាតិចិន លោក លី សាងហ្វូ (Li Shangfu) បានជួបប្រមុខកងទ័ពជើងទឹករុស្ស៉ី នៅទីក្រុងប៉េកាំង ក្នុងខែកក្កដានេះ ភាគីទាំងពីរបានសង្កត់ធ្ងន់អំពីការប្តេជ្ញាពង្រឹងឱ្យខ្លាំងថែមទៀត នូវចំណងទាក់ទងផ្នែកយោធា។ ក្នុងខែដដែលនេះ នាវាចម្បាំងរុស្ស៉ី២គ្រឿង ក៏ទើបតែបានមកធ្វើទស្សនកិច្ចនៅទីក្រុងសៀងហៃផងដែរ៕
