ករណីភ្លើងឆេះភោជនីយដ្ឋានធំមួយ នៅក្រុងបានលុង បំផ្លាញទ្រព្យសម្បត្តិប្រមាណ៥០ម៉ឺនដុល្លារ, សមត្ថកិច្ចចាប់ខ្លួនចៅម្ចាស់ទីតាំង ដែលជាអ្នកលួចដុត

ខេត្តរតនគិរី៖ ករណីអគ្គិភ័យឆេះភោជនីយដ្ឋានពន្លឺថ្មី ដែលមានទីតាំងស្ថិតនៅសង្កាត់ឡាបានសៀក ក្រុងបានលុង ខេត្ដរតនគិរី កម្លាំងសមត្ថកិច្ចចាប់ខ្លួនជនសង្ស័យម្នាក់ ដែលជាចៅម្ចាស់ទីតាំងតែម្ដង ពាក់ព័ន្ធករណីលួចដុតហាងរបស់ជីតាខ្លួន ដោយសារខឹងជីតាកាត់កាលចោល។

ការចាប់ខ្លួននេះ បានធ្វើឡើងនៅព្រលប់ថ្ងៃទី២៨ ខែកក្កដា ឆ្នាំ២០២៣នេះ បន្ទាប់សមត្ថកិច្ចបានសាកសួរទៅកាន់ម្ចាស់ទីតាំងឈ្មោះ ងួន ចាន់ទ្រី អាយុ៦៥ឆ្នាំ ដែលសង្ស័យថា មិនមែនជាករណីឆ្លងចរន្ដអគ្គិសនីនោះទេ។ ក្រោយមកសមត្ថកិច្ចបានប្រើវិធានជំនាញ ទើបឈានដល់ការចាប់ខ្លួនជនសង្ស័យម្នាក់ឈ្មោះ ងួន លីហេង អាយុ១៧ឆ្នាំ ជាចៅបង្កើតរបស់ម្ចាស់ទីតាំងតែម្ដង។

នៅចំពោះមុខសមត្ថកិច្ចជនសង្ស័យបានសារភាពថា ខ្លួនពិតជាអ្នកធ្វើសកម្មភាពលួចដុតភោជនីយដ្ឋានជីតារបស់ខ្លួនប្រាកដមែន ដោយសារខឹងជីតាកាត់កាលចោល។

គួរបញ្ជាក់ថា កាលពីវេលាម៉ោង២៣៖៣០យប់ ថ្ងៃទី២៧ ខែកក្កដា ឆ្នាំ២០២៣ មានករណីឆេះភោជនីដ្ឋានពន្លឺថ្មី ស្ថិតក្នុងភូមិថ្មី សង្កាត់ឡាបានសៀក ក្រុងបានលុង ឆេះអស់ខូចខាតទ្រព្យសម្បត្តិប្រមាណ៥០ម៉ឺនដុល្លារ។ ក្នុងហេតុការណ៍នេះ កម្លាំងនគរបាលពន្លត់អគ្គីភ័យប្រើប្រាស់ទឹកអស់ជាង៤០ឡាន៕