យោធាពាក់ផ្កាយ៣ម្នាក់ខ្យល់គរស្លាប់ ខណៈកំពុងបើករថយន្ត
ភ្នំពេញ ៖ ឧត្តមសេនីយ៍ឯកយោធាពាក់ផ្កាយ៣ម្នាក់ ខណៈបើករថយន្តសុខៗសង្ស័យមិនស្រួលខ្លួនក៏បានឈប់រថយន្តនៅចិញ្ចើមផ្លូវដេកស្លាប់ក្នុងរថយន្ត បង្កការភ្ញាក់ផ្អើលដល់អ្នកដំណើរ កាលពីវេលាម៉ោង៤និង៣០នាទីល្ងាច ថ្ងៃទី៦ ខែកញ្ញា ឆ្នាំ២០២៣ នៅចំណុចមុខមន្ទីរពេទ្យសម្រាកព្យាបាលឯករាជ្យ តាមបណ្តោយផ្លូវចោមចៅ សង្កាត់ភូមិត្រពាំងថ្លឹង១ សង្កាត់ចោមចៅទី១ ខណ្ឌពោធិ៍សែនជ័យ។
ជនរងគ្រោះត្រូវបានគេស្គាល់ឈ្មោះ សាំង អូន ជាយោធាឋានៈឧត្តមសេនីយ៍ឯក ពាក់ផ្កាយ៣ បើករថយន្តម៉ាកRAV4 ពណ៌ស្ករ ពាក់ស្លាកលេខភ្នំពេញ2X3545។
តាមប្រភពព័ត៌មានបានឱ្យដឹងថា មុនពេលកើតហេតុគេបានឃើញជនរងគ្រោះបើករថយន្តធ្វើដំណើរតាមបណ្តោយផ្លូវចោមចៅ ក្នុងទិសដៅពីលិចទៅកើត ខណៈមកដល់ចំណុចកើតហេតុសង្ស័យមិនស្រួលខ្លួន ក៏អែបរថយន្តឈប់នៅខាងមុខមន្ទីរពេទ្យឯករាជ្យ ហើយក៏ដេកស្លាប់តែម្តង។
ក្រោយកើតហេតុ សមត្ថកិច្ចបានចុះមកដល់ចំណុចកើតហេតុហ៊ុមព័ទ្ធរង់ចាំជំនាញមកពិនិត្យជាក់ស្តែង៕
