សម្ដីគ្រូបង្វឹកកម្ពុជា នៅក្នុងសន្និសីទសារព័ត៌មាន មុនជួបបង់ក្លាដែសនៅថ្ងៃស្អែក
ភ្នំពេញ ៖ លោក Felix Dalmas គ្រូបង្វឹកក្រុមជម្រើសជាតិកម្ពុជា បានថ្លែងក្នុងសន្និសីទសារព័ត៌មាន នៅថ្ងៃទី១៤ ខែមិថុនានេះ ដោយបានលើកឡើងថា បន្ទាប់ពីការខំប្រឹងជាខ្លាំង កំឡុងការប្រកួតស៊ីហ្គេម នេះគឺជាការចាប់ផ្ដើមទំព័រថ្មីមួយទៀត ពិសេសសម្រាប់ការវិលត្រឡប់មកដឹកនាំក្រុមគោព្រៃកម្ពុជាជាថ្មី ដែលត្រូវមានការរៀបចំថ្មីជាច្រើន ដូចជាកលល្បិច យុទ្ធសាស្ដ្រ និងតាក់ទិចជាដើម ។ យ៉ាងណាមិញលោកសង្ឃឹមថា នឹងប្រើពេលតិចជាងមុន ក្នុងការរៀបចំក្រុមឲ្យបានល្អប្រសើរ ។
លោកថា «ខ្ញុំបានមើលឃើញកីឡាករថ្មីៗជាច្រើន ក្នុងក្រុម មានទេពកោសលថ្មីៗ ហើយកីឡាករចាស់ៗ ដែលខ្ញុំធ្លាប់ស្គាល់ ក៏មានការរីកចម្រើនជាងមុនដែរ ។ ខ្ញុំសូមអរគុណគ្រូបង្វឹកតាមក្លិបនីមួយៗ ដែលខំប្រឹងបង្ហាត់កីឡាករឲ្យយើងបានជ្រើសរើសមកចូលរួមជម្រើសជាតិ ។ ខ្ញុំមានសុទិដ្ឋិនិយម សម្រាប់កីឡាកររបស់យើង ក៏ដូចជាក្រុមរបស់យើង នឹងអាចធ្វើបានល្អ នាពេលខាងមុខ ឬនាពេលអនាគត» ។
លោក Felix បន្ថែមថា «សម្រាប់ការប្រកួតជាមួយបង់ក្លាដែសស្អែក ខ្ញុំគិតថា គឺជាការប្រកួតដែលលំបាក ហើយជាការប្រកួតដែលត្រូវការប្រើប្រាស់កម្លាំង និងកាយសម្បទាខ្លាំង ។ ក្រុមបង់ក្លាដែស ក៏មានគ្រូបង្វឹកល្អដូចគ្នា ។ ខ្ញុំគិតថា ជាការប្រកួតដែលតានតឹង ។ អ្វីដែលសំខាន់ គឺជាការប្រកួតដំបូង សម្រាប់ខ្ញុំ ក្នុងការចាប់ផ្ដើមថ្មី ក៏ដូចជាការរៀបចំថ្មី ។ ចឹងយើងសង្ឃឹមថា នឹងធ្វើបានល្អ ហើយពួកយើងនឹងព្យាយាមឲ្យអស់ពីលទ្ធភាព» ។
សូមបញ្ជាក់ថា ក្រុមជម្រើសជាតិកម្ពុជា នឹងត្រូវបើកទ្វារ ស្វាគមន៍ក្រុមជម្រើសជាតិបង់ក្លាដែស នាវេលាម៉ោង ៧យប់ថ្ងៃទី១៥ ខែមិថុនាស្អែកនេះ នៅពហុកីឡដ្ឋានជាតិអូឡាំពិក ។ ក្នុងរជ្ជកាលលោក Felix ក៏ដូចជាកាលពីលោក Keisuke Honda ដឹកនាំ កម្ពុជា បានជួបប្រកួតមិត្តភាពអន្ដរជាតិ ជាមួយក្រុមភ្ញៀវបង់ក្លាដែសចំនួន ២លើកមកហើយ ដោយលទ្ធផលចាញ់បង់ក្លាដែស ១-០ ទាំង ២ប្រកួត ។ ដូច្នេះចាំមើលស្អែកនេះ តើនឹងមានការប្រែប្រួលលទ្ធផលយ៉ាងណា៕
